...og þá stundi Mundi....

Frændur okkar Færeyingar

2008-10-28T21:07:00.008Z

Þeir klikka ekki á því frændur okkar í Færeyjum. Nú ætla þeir að leggja fyrir þingið sitt að veita Íslendingum 300 milljóna danskra króna gjaldeyrislán. Spurður um þau skilyrði sem Færeyingar setji fyrir láninu segir Eidesgaard fjármálaráðherra Færeyinga að hann vilji að Íslendingar þurfi ekki að greiða vexti af láninu.
ÞAð er ekki ofsögum sagt að þetta er mikill höfðingskapur og vinarþel sem Færeyingar sýna okkur Íslendingum með þessu.
Ég hef einu sinni komið til Færeyja...það var í janúar 2005. Fór þá og kynnti fjarkennsluna okkar hér í HA fyrir kennurum í Föroyja Læraraskúli og hópi norrænna háskólakennara sem starfaði saman í Nordplus verkefni. Það var frábærlega vel tekið á móti mér og þessir 3-4 dagar sem ég stoppaði þar voru æðislegir, þrátt fyrir slyddu og skammdegi sem ríkti þessa daga. Síðan er ég búin að ganga með það í maganum að fara aftur til Færeyja...að sumri til...og dvelja þar lágmark í viku svo ég geti ferðast um eyjarnar og skoðað allt það helsta af þessari stórbrotnu náttúru sem þar er að finna og njóta alls þess sem, Færeyjar og Færeyingar hafa uppá að bjóða.
Læt mynd frá borðhaldi hópsins á færeysku veitingahúsi fylgja með. Eins og sjá má þá skemmtu færeyskir veitingahúsagestir okkur með færeyskum dansi undir borðum :-)

Og kannski er ekki út í hött á þessum síðustu og verstu tímum að láta áminningarskilti frá færeyskum banka fylgja með.

Og enn snjóar...

2008-10-26T12:09:00.002Z

Svei mér þá, það endar líklega með því að við drukknum í snjó hér fyrir norðan!!! Það virðist ekkert lát vera á þessum ósköpum..
Ætlaði í afmæliskaffi til Hildu í dag en hún hringdi áðan og sagðist vera búin að fresta afmælinu þar sem sennilega er ófært upp heimreiðina hjá henni. Ég verð bara að bíða með að heimsækja hana þar til síðar.

Ég fór í gær með Innbæingunum (Gunnlaugu og fjölsk) inn á Minjasafn að sjá dagskrána „Með ráð undir rifi hverju“ en þar var verið að bjóða upp á sýninguna „Hvað er í matinn“ með smá viðbót sem var smökkun á nýlöguðu skyri, súrsuðum sviðalöppum. lummum og pönnukökum og einhverju fleira. Þetta var ágætis tilbreyting í snjókomunni að skreppa þarna inneftir. Best fannst mér nú samt að fá að smakka söl...hef ekki keypt mér söl í mörg ár, held ég bara.....
Hringdi í gamla vinkonu í Eyjum í gær sem er að berjast við krabbamein. Veit að Guð hefur sennilega tilgang með öllu í okkar lífi, en get ekki annað en fyllst einhvers konar reiði yfir því þegar fólk á besta aldri þarf að mæta þessum örlögum. En ekkert okkar veit víst hver er næstur í þessu tilliti. Guð gefi henni og aðstandendum styrk til að takast á við þennan erfiða sjúkdóm. Þau eru öll í bænum mínum þessa dagana.

Hmmm...nýtt blogg!!

2008-10-23T23:48:00.005Z

Það er nú langt síðan að skrifað hefur verið hér inn. En nú var Kristjana systir að skamma mig fyrir að blogga aldrei...(og ég sem hélt að enginn læsi þetta) þannig að það er best að athuga hvort mér tekst að halda lífi í þessu bloggi eitthvað áfram. Er nú samt ansi löt við svona skriftir þannig að enginn skyldi verða hissa þó þetta lognaðist út af aftur.
Héðan er allt gott að frétta. Veturinn kominn í öllu sínu veldi og svona var nú umhorfs er maður byrjaði að hreinsa bílinn sinn í morgun:

Það væri nú að bera í bakkafullan lækinn að minnast á ástandið í landsmálunum hér á Íslandi þannig að best er að sleppa því. Þetta er allt að fara til fj....hvort sem er :-)
Bjössi, Anna Lára og Tanja komu hér um síðustu helgi og áttum við notalega helgi saman fjölskyldan. Við fórum öll ásamt Gunnlaugu og strákunum (Daníel var í vinnuferð í Rvk) út í Laufás á laugardeginum en þar stóð Laufáshópurinn fyrir sýningu um haustverkin í gamla daga. Á heimleiðinni komum við svo við í Jólagarðinum. Um kvöldið borðuðum við öll saman hér í Hlíðargötunni og svo var öll hersingin í afmæliskaffi á sunnudeginum. Já, maður átti svo sem afmæli á sunnudaginn!!! :-)
Fékk meira að segja slatta af blómum og gjöfum, þó ekki væri þetta stórt afmæli.
Og svo er bara komin helgi enn á ný á morgun...verða komin jól áður en maður veit af!!!

Góð lesning

2008-06-05T10:11:00.001Z

Man ekkert hvar ég rakst á þessa lesningu, en allavega er hún þörf:
Að sleppa...!
1. Að sleppa tökum þýðir ekki; að hætta að þykja vænt um. Það þýðir; ég leysi ekki viðfangsefni annarra.
2. Að sleppa, þýðir ekki að einangra sig frá, heldur að skilja að ég get ekki stjórnað öðrum.
3. Að sleppa er ekki að standa undir, heldur að leyfa öðrum að læra af eigin reynslu.
4. Að sleppa er að viðurkenna vanmátt, sem þýðir; úrslitin eru ekki í mínum höndum.
5. Að sleppa er ekki að reyna að breyta öðrum eða ásaka, heldur að gera það sem ég get úr mér.
6. Að sleppa er ekki að bera ábyrgð á, heldur að bera umhyggju fyrir.
7. Að sleppa er ekki að kippa í lag, heldur að vera hvetjandi.
8. Að sleppa er ekki að dæma, en að leyfa öðrum að vera eins og þeir eru.
9. Að sleppa er ekki að vera önnum kafinn við að stjórna öllu og öllum, heldur að leyfa öðrum að hafa áhrif á eigin örlög.
10. Að sleppa er ekki að vernda, heldur að leyfa öðrum að horfast í augu við staðreyndir.
11. Að sleppa er ekki að afneita, heldur að sætta sig við.
12. Að sleppa er ekki að nöldra, rífast eða skammast, heldur að leita að eigin mistökum og lagfæra þau.
13. Að sleppa er ekki að laga allt að mínum óskum, heldur að taka hvern dag fyrir og njóta hans.
14. Að sleppa er ekki að gagnrýna eða skipuleggja aðra, heldur að vera það sem mig dreymir um að vera.
15. Að sleppa er að velta sér ekki upp úr fortíðinni, heldur að þroskast og njóta dagsins í dag og framtíðarinnar.
16. Að sleppa er að óttast minna og elska meira.....

Skrýtin stafsetning

2008-03-17T13:51:00.002Z

Á forsíðu Mbl.is mátti í morgun lesa þessa frétt: „Fíkniefni haldlögð á Akureyri“. Hvaðan í ósköpunum kemur þetta sagnorð: „að haldleggja“ ??
Er þetta nú ekki einum of mikil gróska í að búa til sagnorð??? Setningin „Hald lagt á fíkniefni á Akureyri“ er alveg jafnlöng nema sem svarar einu stafabili og einum staf......en þó mun skárri íslenska að mínu mati.

Til umhugsunar

2008-01-27T18:38:00.001Z

Fékk þetta sent í tölvupósti nýlega. Bara snilld :-)

Nú þegar árið 2007 hefur runnið sitt skeið, langar mig að nýta tækifærið og þakka fyrir alla tölvupóstsendingarnar sem ég hef fengið frá ykkur. Ég verð að segja að lífsgæði mín hafa aukist til muna við sendingarnar.

Takk til þess (hver sem það nú var) sem sendi mér upplýsingarnar um að það hefði í mörgum tilfellum fundist rottuskítur í límröndinni á umslögum. Þær dýrmætu upplýsingar leiddu til þess að ég nota nú votan klút í hvert skipti sem ég þarf að loka umslagi. Af sömu ástæðu finn ég mig nú knúna til að þvo hverja dós sem ég þarf að opna.

Í dag á ég heldur ekkert sparifé, þar sem ég hef sent það allt til itlu veiku stúlkunnar (Penny Brown) sem er akkúrat núna í andaslitrunum á sjúkrahúsinu í 1.387.258
skiptið.

Ég á í rauninni enga peninga lengur. en það mun náttúrulega breytast um leið og ég fæ 500.000$ sem Microsoft ætlar að senda mér fyrir að hafa verið "exclusivur" þátttakandi í e-mail prógramminu þeirra. Ég á líka von á aur frá miðaldra getulausum bankastarfsmanni frá Nígeríu sem hefur lofað að deilda 7 milljónum$ með mér. Aur sem hann erfði eftir að gleymdur ættingi hans lést í skelfilegu umferðarslysi í höfuðborginni Abuja.Yndislegur maður hann Ade Oluwa! Alveg sérstök sál.

Sem betur fer þarf ég ekki að óttast um sál mina, þar sem ég er blessuð með 363.214 englum sem passa mig og vakta sérhvert spor mitt og St. Helena hefur líka boðist til að uppfylla allar mínar óskir.

Mig langaði bara að segja ykkur frá því að ég nota ekki lengur krabbameinsvaldandi svitalyktaeyði, þrátt fyrir að ég lykti illa af svita á heitum sumardegi. Ég er alveg hætt því!

Takk fyrir að sýna mér og kenna að óskir mínar muni aldrei verða uppfylltar nema ég áframsendi tölvupóstana mína til amk 7 einstaklinga á innan við 5 mínútum.

Ég vil einnig þakka ykkur fyrir að hjálpa mér með að hætta að drekka Coca Cola, og upplýsa mig um að það megi hreinlega fjarlægja kalkúrfellingar úr salernum með því.

Ég set aldrei lengur bensín á bílinn hjá Olís án þess að vera vakandi fyrir því að pólskur fjöldamorðingi sem komist hefur ólöglega inn í landið, gæti mögulega hafa laumað sér í aftursætið meðan ég fylli tankinn.

Ég svara ekki lengur neinum sms-um, þar sem það kostar mig 25.000 kr. að svara ákveðnum númerum.

Fyrir tilstuðlan vingjarnlegar ráðlegginga, get ég nú ekki lengur leyft mér að beygja mig eftir krónu sem liggur á götunni, þar sem það liggur eflaust kolóður kynferðisglæpamaður undir bílnum og bíður þess að geta gripið í fæturna á mér og dregið mig til sín og nauðgað mér.

Ef þú sendir ekki þennan tölvupóst til amk 144.000 einstaklinga á næstu 70 mínútum, þá mun risavaxin dúfa með svæsin niðurgang lenda á höfðinu á þér kl. 17 nú í dag og flær úr 12 mongólskum kameldýrum munu skríða inn í bakið á þér og orsaka að rassinn á þér verður allur kafloðinn.

Og svo langar mig bara líka að deila því með ykkur að Suðuramerískur vísindastúdent sem ég þekki hefur eftir langar og strangar rannsóknir uppgötvað að aðeins einstaklingar með lága greindarvísitölu, sem stunda lítið kynlíf eru manneskjurnar sem alltaf lesa alla tölvupósta með höndina á músinni.

Lifið svo innilega heil!!

Til hamingju, frænka

2007-12-30T02:21:00.000Z

Ég má til með að óska henni Margréti Láru frænku minni og nemanda til átta ára til hamingju með þennan frábæra árangur sinn, en hún var valin íþróttamaður ársins 2007 í gærkvöldi. Að öðrum ólöstuðum finnst mér Margrét Lára ákaflega vel að þessum titli komin. Það hefur verið gaman að fylgjast með ferlinum hjá henni allt frá því hún var í sjö ára bekk og þusti út í frímínútur til að spila fótbolta við strákana í bekknum sínum og fram á þennan dag að hún er í fremstu röð á sínu sviði.
Ekki er svo minna um vert hvað Margrét Lára er góð fyrirmynd hinna yngri en hún hefur ævinlega seiglast áfram á eigin verðleikum og aldrei mér vitanlega tranað sér fram eða upphafið sjálfa sig á kostnað amnnarra. Það var gaman að vera kennarinn hennar í átta ár og fylgjast með henni vaxa og þroskast og samgleðst ég henni svo sannarlega með þennan árangur. Sendi líka Guðmundu og Viðari frænda mínum innilegar hamingjuóskir með stelpuskottið!!! :-)

Alveg er þetta ótrúlegt

2007-11-22T21:16:00.001Z

Steinunn Vladís flutti tillögu um það á Alþingi að fundin yrðu ný starfsheiti sem kæmu í stað starfsheitanna ráðherra, sendiherra og slíkra heita sem hafa orðið herra sem endingu.
Ég sé ekki annað en þetta sé hið ágætasta mál enda ekki viðeigandi á því herrans ári 2007 að kenna heiti á störfum sem bæði kynin gegna við svo karllægt orð sem herra, enda t.d. löngu búið að finna upp ný heiti fyrir starfsheiti eins og flugfreyjur, hjúkrunarkonur o.fl.
En viti menn....karlkynshelmingur Moggabloggara rís þvílíkt upp á afturfæturna til að mótmæla þessari „ósvinnu“ að ég hef sjaldan séð eins margar athugasemdir við frétt á Mbl.is eins og við þessa.
Merkilega vanþroska þessi karlpeningur :-)

Komin aftur

2007-11-20T20:58:00.000Z

Ég er nú svo sem löngu komin aftur, en hef ekkert nennt að blogga frekar en fyrri daginn. Ferðin var fín, sannkölluð ævintýraferð. Er með ferðasöguna í smíðum en lofa nú ekki að vera búin með hana fyrr en eftir langan tíma :-)
Ég setti slatta af myndum úr ferðinni inn á myndasafnið mitt en skemmti mér jafnframt við að búa til smá vídeó úr þessum sömu myndum.

Hægt er að skoða vídeóið í stærri upplausn með því að smella hér.
Eftir heimkomuna hefur svo verið nóg að gera í vinnunni og ýmsu öðru. Alltaf gott að hafa nóg að gera :-)

Farin

2007-09-28T19:35:00.000Z

Hér með tilkynnist að ég er farin til Grikklands :-)
Fljúgum út til London í fyrramálið og þaðan á Preveza flugvöll á Grikklandi í býtið á sunnudagsmorgun. Verðum væntanlega komin um borð í skútuna „okkar“ um miðjan dag á sunnudaginn.
Erum sem sé að fara í skútusiglingu (svokallaða Flotilla sailing – Shore to Sail) í eina viku og verðum svo aðra viku í viðbót í stúdíóíbúð og með bílaleigibíl.
Nánar má lesa um þessa „ævintýraför“ okkar hér:
http://www.sailingholidays.com/route-detail.asp_Q_RouteID_E_7

Og svona lítur fína skútan „okkar“ út:

http://www.sailingholidays.com/yacht-detail.asp_Q_YachtID_E_2

Segiði svo að maður sé ekki pínu „klikk“ :-)

Jarðgöng til Eyja

2007-07-25T14:44:00.001Z

Í tilefni af umræðum um jarðgöng til Eyja, er svolítið skemmtilegt að lesa bloggið hjá honum Pálma Óskarssyni í Stórhöfða þar sem hann vitnar í ummæli nokkurra merkra manna um gerð Hvalfjarðagangna á sínum tíma.
Ég er nú ekki alveg búin að gera upp við mig hvort mér finnst göng til Eyja vera fýsilegur kostur, en eitt er víst að samgöngur til Eyja þarf að bæta og það er skömm að vita til þess hvernig búið er að Eyjamönnum í samgöngumálum

Skondin frétt á eyjar.net:

2007-07-11T13:32:00.001Z

Á vefnum eyjar.net, má lesa þessa frétt:

„Sandsíli fækkar við Eyjar
Enn minna af sandsíli virðist vera umhverfis Vestmannaeyjar en á sama tíma í fyrra, samkvæmt fyrstu fregnum af sandsílarannsóknum Hafrannsóknastofnunar á svæðinu. Sandsílið er þýðingarmesta fæða lundans og hefur stórlega dregið úr varpi hans tvö ár í röð".

Þarna mætti ætla af fréttinni að sandsílið fjölgaði sér með því að verpa (eggjum væntanlega).
Þetta er dæmi um frekar óheppilega orðaröð :-) :-)

Bloggleti

2007-07-05T01:40:00.001Z

Jæja, Drífa frænka mín í Hrísey, ofurbloggari með meiru er farin að kvarta undan bloggleysi á þessari síðu....
Ja...jamm og jæja...maður ætti nú kannski bara að fara að blogga aftur :-)

Sit reyndar sveitt við að koma saman smá fræðilegum fyrirlestri um blogg sem ég ætla að röfla um í London í endaðan júlí. Maður getur nottlega ekki bæði bloggað og skrifað um blogg í einu....

Bjánalegar auglýsingar

2007-04-05T13:53:00.001Z

Ósköp finnast mér leiðinlegar þessar fermingaskeytaauglýsingar hjá póstinum í ár: „Halla fékk 43 skeyti. Flest af öllum í bekknum“. Þarna finnst mér svo klárlega verið að hamra á metingi milli barna, nokkuð sem við fullorðnir ættum ekki að ala svona augljóslega á. Ég stend mig að því að senda mín fermingarskeyti frá öðrum fyrirtækjum þetta árið...jafnvel þó ég þurfi að hafa svolítið fyrir því.

Súkkulaði er gott

2007-03-23T23:08:00.001Z

Rakst á þetta á vafri mínu um bloggheima nú í kvöld. Mátti til með að leyfa fleirum að njóta. Þetta er bara snilld :-)

12 spora kerfið við súkkulaðifíkn:

1. Ég mun viðurkenna vanmátt minn gagnvart súkkulaði

2. Ég mun taka Nigellu úr Guðatölu og líta á hana sem manneskju

3. Ég mun taka burt allar kökubækur úr svefnherberginu

4. Ég mun aðeins lesa kökublað Gestgjafans einu sinni á dag

5. Ég mun hætta að baka við öll tækifæri, þ.m.t. á þjóðhátíðardag Normanna, Svía, Belga, Dana osfrv.

6. Ég mun viðurkenna að það er ekki verið að tala beint til mín
þegar birtist súkkulaðiauglýsing í sjónvarpinu.

7. Ég mun hætta að enda mínar bænir með “…að eilífu, Snickers.”

8. Ég mun ekki skíra börnin mín Lindu, Nóa eða Mónu.

9. Ég mun aldrei framar syngja “Þú ert súkkulaði, súkkulaði, súkkulaði hæna”

10. Ég mun viðurkenna að Sælgætisland er ekki til og Glámur og Skrámur séu óæskilegur félagsskapur.

11. Ég mun viðurkenna að súkkulaði er ekki eitt af frumefnum og við getum lifað án þess.

12. Ég mun flytja öðrum súkkulaði fíklum þennan boðskap án þess að slefa…

Mismunandi menningarheimar

2007-01-20T16:44:00.001Z

Las það í Blaðinu í morgun að einhver sendinefnd þingkvenna sem fór frá Íslandi til Saudi-Arabíu í byrjun janúar í opinbera heimsókn hafi öll hulið hár sitt slæðu að hætti múslima-kvenna.

Ég verð nú að taka undir þá skoðun Steinunnar Jóhannesdóttur rithöfundar í þessari grein að mér finnst þetta algerlega út í hött og eiginlega bara óvirðing við jafnréttisbaráttu kvenna.

Mér finnst það alger óþarfi að gera slíkt til að láta í ljós einhverja „virðingu“ við gestgjafana í slíkum ferðum. Það er okkur ekki tamt að klæðast með þessum hætti og umburðarlyndið hlýtur að eiga að virka á báða bóga. Við hljótum að geta ætlast til að gestgjafar okkar beri virðingu fyrir okkar menningu og hefðum í klæðaburði alveg eins og við eigum að virða þeirra hefðir. Ég er ekki viss um að heittrúaðar múslimakonur myndu sleppa því að hylja sig slæðu þó þær kæmu í heimsókn til Íslands ef þær væru á annað borð vanar að klæðast þannig.

Moggavefurinn

2007-01-18T13:02:00.001Z

Á Moggavefnum í dag var þessi frétt:

„Mikið óveður er nú skollið á í Þýskalandi. Varað hefur verið við því að
vindhraðinn geti náð 150 km hraða og ollið gríðarlegum skemmdum“.

Það var nefnilega það ...hann mun sem sé ekki valda skemmdum heldur olla skemmdum.

Þá vitum við það..... :-)

Jafnrétti og íþróttir

2006-12-28T02:05:00.001Z

Fylgdist með umfjöllun um knattspyrnumann og konu ársins í kvöldfréttunum. Beið spennt eftir að heyra og sjá viðtal við hana Margréti Láru frænku mína og nemanda til margra ára....en viti menn....Nei, í fréttunum var bara rætt við Eið Smára og ekki eitt einasta orð við Margréti Láru. Frekar hallærislegt verð ég að segja!!

Jólagjafir og allsnægtir

2006-12-28T01:59:00.001Z

Ég veit að það hljómar eins og vanþakklæti, en ég var samt að velta fyrir mér einu í sambandi við jólagjafir. Ég fæ árlega jólagjöf frá einni bankastofnuninni sem ég á viðskipti við. Nú er það svo að ég efast ekki um að góður hugur fylgir þessari gjöf. Samt verður mér á að hugsa hvort þeim fjármunum sem kostað var til hennar væri ekki betur varið í að styrkja eitthvert gott málefni en að eyða þeim í jólagjafir handa fólki eins og mér og miklu fleirum sem eiga allt af öllu og eru ekki í neinni þörf fyrir eitthvert glingur sent frá peningastofnun sem maður skiptir við. Ætti ég að skrifa Bjarna Ármannssyni og viðra þessa skoðun mína??

Verkefnayfirferð og annað stúss!!

2006-12-02T15:08:00.001Z

Æ, hvað ég nenni ekki að þurfa að vinna og vinna alla helgina!! Mig langar að jólast eitthvað eða gera eitthvað annað skemmtilegt!!! :-(

En best að vera jákvæður.....þetta tekur vonandi enda og ef til vill hægt að eiga nokkra frídaga milli jóla og nýárs!!

Tekur sig vel út

2006-12-02T02:43:00.001Z

Kata litla (nú verður hún reið við mig :-) ) kom hér seint í kvöld á leið heim af skólaballi svo ljómandi fín í íslenskum búningi. Ég mátti til með að smella af henni mynd.

Flottur fídus

2006-11-19T22:04:00.001Z

Mikið er þetta nú þægilegur fídus í Firefox að geta bara smellt upp ritlinum fyrir bloggið og byrjað strax að blogga án þess að ræsa nokkuð annað upp!!

Snilld!!! :-)

Leikið með liti

2006-11-16T23:58:00.000Z

Var að leika mér aðeins með myndvinnslu í kvöld...rifja upp hvernig maður gerir mynd svarthvíta en heldur samt hluta af henni litaðri
Það hafðist og hér sést litla Tanja Rut ömmustelpa í svarthvítu og lit :-)

Veturinn að bresta á

2006-11-12T16:40:00.000Z

Jæja, þá er víst veturinn að skella á okkur. Allavega var ansi vetrarlegt um að litast þegar ég vaknaði í morgun eins og sjá má á þessum myndum hér fyrir neðan:

Lífsstíll

2006-09-22T15:27:00.000Z

Hvað er málið með þetta „lífsstílskjaftæði“??

Las í Fréttablaðinu í dag að búið væri að opna nýja lífsstílsbúð á Laugarveginum. Fór þá að hugsa hvað átt væri við með „lífsstílsbúð“.
Eru ekki allr búðir „lífsstílsbúðir“??
Hljóta ekki vörur sem seldar eru í öllum búðum að falla að lífsstíl einhvers??
Er t.d. ekki RL-búðin (Rúmfatalagerinn) lífstílsbúð??

Ég skil vel þegar talað er um að fólk ætli að gera hitt og þetta að sínum lífsstíl, eins og t.d. reglubundna hreyfingu, hollt mataræði og þessháttar, en að tala um lífsstílsbúðir finnst mér nú bara vera gersamlega út í hött!!!

Eða þannig :-)

„Góðir“?? pennar...eða þannig....

2006-09-16T19:38:00.000Z

Úr Fréttablaðinu 27. ágúst (höf. Álfrún Pálsdóttir):

"Þar sem ég þeystist um sveitir landsins sem farþegi í bíl gat ég gefið náttúrunni gaum og það eina sem ég virtist sjá voru kindur. ... Kindur hafa sem dýr lítið skemmtanagildi enda gera þær lítið annað en að standa kyrrar, bíta gras og gefa frá sér hljóð stöku sinnum. En sveitin er full af þeim, hvert sem maður lítur er kind að gera nákvæmlega ekki neitt gagnlegt og stígur ekki beint í vitið. En á hverju einasta sumri er þúsundum kinda sleppt lausum út í náttúruna þar sem þær spranga um fjöll og firnindi og valda mörgum ökumanninum vandræðum á þjóðveginum enda láta þær bíla ekkert á sig fá."

Er ekki allt í lagi?????

Ég er ekki hissa þó það gangi illa í fjölmiðlabransanum ef kröfurnar sem gerðar eru til skriffinna í þessum blöðum er ekki meiri!!!

Leti og/eða flótti

2006-08-27T20:59:00.000Z

Er ekki um að gera að blogga þegar maður á að vera að gera eitthvað annað???
Ætti ða vera að fara yfir verkefni en nenni því auðvitað ekki....!!!

Allt gott að frétta héðan. Erum búin að fara vestur í þvílíkri rjómablíðu í vikunni fyrir versló. Og svo var nú versló svo sem ekkert slor. Ekkert spes veður svo sem en ágætt samt, og Bjössi og fjölsk. komu að sunnan og vinir þeirra með þeim svo það var glaumur og gleði í Sandvíkinni. Þegar Gulla mín og hennar fjölsk. var komin líka var nú aldeilis glatt á hjalla í kotinu. Mesta furða hvað allir komust fyrir.
Eftir versló tók svo vinnan við...sem er svo sem ekki skemmtilegt, en verður víst ekki umflúið. Vettvangsnemarnir byrjuðu viku eftir versló svo það var eins gott að bretta upp ermarnar.
Hjálmfríður vinkona mín og fyrrv. skólastjóri úr Eyjum er svo að byrja í framhaldsnáminu hjá okkur hér í HA, þannig að hún kemur hingað norður í lotu einu sinni í mánuði. Hún dvelur hér hjá mér þá daga og er ég afskaplega kát að fá hana svona oft í heimsókn. Næst kemur hún 11. sept og ég er strax farin að hlakka til :-)

Og svo er það bara Kaupmannahöfn eftir 5 daga...víííí.... Hlakka til.
Bless þangað til ég kem heim aftur!!!
P.s Við Frissi höngum saman enn....Vill einhver veðja????

Síðan síðast!!

2006-07-30T13:24:00.000Z

Jæja...nú er orðið svo langt síðan að ég hef bloggað að ég var næstum búin að gleyma lykilorðinu mínu :-)

Það hefur nottlega svo margt á mína daga drifið síðan í nóvember að ég bloggaði síðast að það gengur engan veginn að gera því öllu skil. En staðan á mínu lífi í augnablikinu í hnotskurn er sú, að ég er í sumarfríi og hef það gott :-)
Búin að skreppa suður og heimsækja ömmubarnið og leika mér með henni og blessuðum „miðlungnum“ honum syni mínum sem var í sumarleyfi heima með dóttur sína. Við þvældumst dálítið um, skoðuðum allt Reykjanesið og fórum í bústað tengdaforeldra hans sem er skammt frá Þrastaskógi og höfðum það í alla staði hið besta.
Nú svo er ég auðvitað búin að dvelja í Sandvíkinni meira og minna (suma daga ásamt Gunnlaugu og fjölskyldu) og snurfusa þar eins og sjá má á myndinni sem fylgir þessu bloggi.
Við Frissi erum svo að velta fyrir okkur að skreppa vestur á firði að gamni okkar eftir helgina ef veður leyfir, en aðalferðin okkar verður svo ekki fyrr en 1. sept. þegar við förum til Kaupmannahafnar í rúml. viku með Bjössa og Önnu Láru og Tönju.

Blessaður „ellistyrkurinn“ (Jóhann, yngri sonurinn) útskrifaðist með BS-gráðu í tölvunarfræði frá Háskólanum á Akureyri 10. júní og er núna farinn til Reykjavíkur að vinna og vinnur hjá Ísor sem er fyritæki í orkurannsóknum. Ég er bara nokkuð montinn með „litla greyið“ því hann fór inn í HA án þess að hafa stúdentspróf (veit reyndar ekki á hvaða lyfjum deildarforseti tölvunarfræðideildar var þegar hann hleypti honum inn þetta ungum og án stúdentsprófs :-) en allvega ...drengurinn kláraði dæmið og það á réttum tíma þannig að það er bara fínt.
Ekki er þó laust við að fjarvera hans liti heimilislífið, því þó ekki færi mikið fyrir honum á heimilinu, blessuðum, þá eru það nú viss viðbrigði þegar síðasta barnið fer að heiman.
Við Frissi erum að upplifa það í fyrsta skipti núna að búa saman barnlaus(Gunnlaug var orðin 3 mánaða þegar við byrjuðum að búa saman fyrir alvöru á eigin heimili). Kannski kunnum við það bara ekkert og verðum bara skilin um áramót!!! Hver veit???

Stay tuned!!!

???

2006-04-08T09:25:00.000Z

Spurning hvort maður ætti að fara að blogga aftur!!!!!

Þá veit maður það.....

2006-04-08T09:23:00.000Z

How Will I Die Quiz

You will die at the age of 96

You will die by choking while trying to eat a live hamster

Find out how you will die at Quizopolis.com

Trölla hvað.....

2005-11-17T21:52:00.000Z

Hilda vinkona mín var með tröllapróf á síðunni sinni. Ég stóðst ekki mátið og „Stjórnmálatröll“ varð það, heillin!!!
Ég sem hef minna en ekki neitt vit á stjórnmálum og leiðist yfirleitt stjórnmálaumræða, puff.....

Stjórnmálaþurs

Þú ert vanaföst, tilfinningarík félagsvera.

Í margmenni á stjórnmálaþursinn oftar en ekki orðið. Ef einhver hyggst grípa fram í fyrir honum talar hann bara hærra - og það virkar. Hann hefur sterkar skoðanir á flestu, hvort sem um er að ræða fjárlagahalla ríkisins eða það hvort SS eða Goða pylsur eru betri, og gerir hvað hann getur til að þröngva þeim upp á aðra. Stjórnmálaþursinn þarf að passa sig þegar hann er í nærveru þeirra sem eru ósammála honum því blóðþrýstingurinn á það til að rjúka upp.
Stjórnmálaþursinn vantar ekki nýja skó fyrr en það er komið gat á þá gömlu... sem skósmiðurinn segist ekki geta gert við. Stjórnmálaþursinn veit hvar Guðsteinn er með verslun.
Hvaða tröll ert þú?

Sunnudagur

2005-10-30T21:55:00.000Z

Það er nú ekki eins og ég hafi hugmynd um það hvað ég á að skrifa hér inn. Lífið er svona mest og best vinna, éta og sofa með fáum útúrdúrum. Var að klára síðustu vettvangsheimsóknina á föstudaginn og á miðvikudaginn koma kennsluréttindanemarnir mínir í fyrstu lotuna að þessu sinni. Hlakka til að hitta þá :-)
Einhvern veginn er þetta haust bæði langt og kalt og lítið fjör í manni. Maður er strax farinn að láta sig dreyma um sumarið og finnur til fiðrings þegar sólarlandabæklingarnir detta inn um dyrnar. Ekki það að ég hafi nokkurn tímann farið í venjulega sólarlandaferð. Býst ekki við að það eigi við mig að dorma í sólbaði á einhverri strönd.
En jú,...það er auðvitað hægt að gera ýmislegt fleira á þessum stöðum en liggja í sólbaði. Er því að spá í að skella mér kannski til Grikklands næsta sumar....allavega ætla ég að láta mig dreyma um það á meðan snjór og frost er úti :-)
Er að spá í að taka mér opinbert blogghlé smátíma...ég er hvort sem er svo löt við að blogga að það er alveg jafn gott að viðurkenna það bara og taka sér frí heldur en að gera þetta svona með hangandi hendi.Sjáum til!!!!

Að kvöldi kvennafrídags

2005-10-24T23:22:00.000Z

Mikið ljómandi var nú gaman í dag. Konur á Akureyri og nágrenni fylltu Sjallan þannig að við lá að það flæddi út úr. Þetta var yndisleg dagskrá sem boðið var uppá. Allt auðvitað atriði sem konum sáu um. Kvennakór, óperusöngur og svo söng ung, gullfalleg stúlka frá Úkraínu (minnir mig) tvö lög. Nú svo voru auðvitað barátturæður í tilefni dagsins eins og lög gera ráð fyrir.
Í kvöld hringdi svo Jóna vinkona mín úr Eyjum til að deila með mér broti af þessum degi en við eyddum einmitt þessum degi smana fyrir 30 árum. Fórum saman í gönguna og á fundinn og svo í kaffi til mömmu á eftir. Henni fannst þessi dagur ekki mega enda öðruvísi en að heyra í mér. Notalegt að eiga svona vinkonu.
Við kjöftuðum ábyggilega í klukkutíma eða meira enda langt síðan við höfum spjallað saman. Það var ekki laust við að ég fengi smá snert af heimþrá að heyra í henni :-(
Verð að fara að drífa mig í heimsókn til Eyja!!!

Ein vikan enn liðin

2005-10-23T18:23:00.000Z

Ég hef lítið sinnt bloginu mínu undanfarið og er það svo sem ekkert nýtt. Æ, ég get bara ekki verið svona daglegur bloggari..„sorry“ :-)
Eftir Svíþjóðarferðina er búið að vera mikið að gera...ýmislegt sem sat á hakanum á meðan dvalið var þar. Nú eru 3. árs nemarnir á fullu í æfingakennslunni og þó mér finnist svo sem aldrei neitt sérlega gaman að lesa verkefni, þá er ekki annað hægt en hafa gaman af að lesa dagbækurnar þeirra núna. Það er svo margt sem þau eru að upplifa sem maður sjálfur jú þekkir eftir langan starfsferil sem grunnskólakennari. Þetta virðist ganga ótrúlega vel hjá þeim flestum.
Svo fer nú að styttast í að kennsluréttindanemarnir mínir komi í lotu og verður spennandi að byrja að vinna með þessum hóp. Nú er maður búinn að keyra þetta námskeið einu sinni áður og spennandi að sjá hvernig þessi hópur er miðað við í fyrra. Svo er maður sjálfur líka öruggari en í fyrra þegar maður er búinn að prufukeyra þetta einu sinni.
Að öðru leyti gengur lífið svona mest sinn vanagang, skin og skúrir...þó mestmegnis skin sem betur fer :-)
Já, það er nú það.......

Komin heim

2005-10-06T08:45:00.000Z

Jæja, allt teku enda, líka Svíþjóðarferð. Áttum yndislega daga hjá Agnetu og Mats. Hittum allar konurnar sem voru með mér í Comeníusarverkefninu ásamt mökum þeirra eitt kvöldið. Þá var nú heldur betur glatt á hjalla :-)
Skoðuðum okkur svolítið um, fórum m.a. til Sigtuna, Uppsala og Norrtelje ásamt styttri túrum í kringum Tullen þar sem Agneta býr. Eyddum einum degi bara í Stokkhólmi og fórum svo það kvöld niður til Nynäshamn þar sem námskeiðið sem ég var á, var haldið. Ég sá nú ósköp lítið af þeim stað, því við vorum að vinna allan daginn, en Frissi gat skoðað sig svolítið um. Þetta er svona „skemmtibáta-staður“ í skerjagarðinum en verst var að það var búið að loka svo mörgum afþreyingarfyrirtækjum því það var orðið svo áliðið. Frissi fann t.d. engan stað þar sem hægt var að leigja skemmtibáta eða eitthvað slíkt. Ég skutlaði öllum myndunum í einni hrúgu (óflokkað)inn á myndasafnið mitt.

Myndablogg

2005-09-29T12:23:00.000Z

Hadegishressing i Norrtelje!

Myndina sendi Eygló

Myndablogg

2005-09-23T15:35:00.000Z

20 stiga hiti og sol i Svithjod. Erum hja Agnetu og Mats i godu yfirlæti. Hofum meira ad segja thetta litla gestahus ut af fyrir okkur. Yndislegt lif :-)

Myndina sendi Eygló

Klukk sem bíður

2005-09-21T12:09:00.000Z

Hún Tóta „klukkaði“ mig...verð að finna mér tíma til að sinna því :-)
Er annars að fara suður á morgun og til Stokkhólms á föstudaginn á ráðstefnu, þannig að ég veit ekkert hvort ég hef tíma til að sinna klukki fyrr en ég kem aftur :-)

Myndablogg

2005-09-14T19:27:00.000Z

Það er fallegt i Mývatnssveit núna!...
Fór í Fellabæ að hitta nemann okkar sem er þar í æfingakennslu. Átti góða stund með henni og leiðsögukennaranum hennar. Á heimleiðinni skartaði Mývatnssveit sínu fegursta og var eins og ævintýraland yfir að líta í hausttsólinni.
Myndina sendi Eygló

Úrið fundið

2005-09-11T16:44:00.000Z

Skarpp í gær aftur í berjamóinn sem ég fór í á sunnudaginn var til að leita að úrinu mínu sem ég týndi þar í móunum.. Og haldiði að ég hafi bara ekki fundið úrið......
Þvílík tilviljun!!!!!

Berjatínsla

2005-09-02T08:45:00.000Z

Ætti maður að nenna í ber á sunnudaginn?? Svei mér sem ég veit það, í þessari rigningu og kulda alla daga!!!
Á að vísu heimboð að Kóngsstöðum í Svarfaðardal til berjatínslu á sunnudaginn, en eins og veðrið er núna þennan föstudagsmorgun freistar það nú ekkert sérstaklega til mikillar útiveru.

Pysjuhópurinn

2005-08-31T16:39:00.000Z

Um síðustu helgi hittist „pysjuhópurinn“ út á Hauganesi. Pysjuhópurinn er einvala-lið úr fyrrverandi Barnaskóla Íslands sem heimsótti okkur til Eyja árið 1994. Þá höfðum við það notalegt saman eina helgi, borðuðum lunda, drukkum rauðvín, fórum á pysjuveiðar, gengum á fjöll og ýmislegt fleira. Í fyrra bauð ég þessum hópi til mín í Sandvíkina til að rifja upp gömul kynni og áttum við saman yndislega kvöldstund í lok ágúst. Núna varð Birgir Sveinbjörns (sem var skólastjóri í BÍ '94) fyrri til og bauð hópnum til sín í Steinnesið en hann á einmitt sumarathvarf á Hauganesi rétt eins og ég. Það þarf vart að taka það fram að við áttum frábært kvöld saman og svo hittumst við bara að ári í Sandvíkinni. Skellti inn mynd af hópnum í fyrra!!

Rósin frá Hildu

2005-08-22T19:05:00.000Z

Hún Hilda mín færði mér rós í potti í tilefni nýja barnabarnsins í sumar. Það voru á henni einir 5 knúppar sem voru að byrja að springa út. Næstu dagana visnuðu þeir allir upp og duttu af og ég hélt að nú væri rósin að deyja. Hins vegar fór svo að rósin bætti á sig fullt af nýjum blöðum í staðinn fyrir knúppana og nú eru komnir á hana tveir knúppar og annar þeirra er nú útsprunginn og svo ljómandi fallegur.
Ástararþakkir Hilda mín :-)

Tíminn æðir áfram

2005-08-21T21:22:00.000Z

Jæja,jæja.....ekki mikið skrifað hér en nú verður bætt úr því.
Búin að fara suður og vera viðstödd skírnina hjá barnabarninu. Það gekk auðvitað ljómandi vel. Nokkrar myndir má sjá á myndasíðunni. Fórum suðurleiðina heim. Það var fínt, en veðrið hefði mátt vera betra. Þoka og lágskýjað mest allan tímann.
Nú er skólinn að fara á fullt. 3. árs nemarnir búnir að koma og eru nú farnir út í skólana og að byrja sitt vettvangsnám. Þetta er hress og duglegur hópur sem vonandi á eftir að spjara sig vel. ÞAð er svo von á fyrstu verkefnunum frá þeim eftir viku.

Það er búið að vera óvenju mikið um gleðskap hjá mér undanfarna viku. Hóaði hingað til mín nokkrum frænkum mínum úr föðurættinni í mat á þriðjudaginn var. Þær eru allar búsettar hér á Akureyri (og Hrísey) utan ein sem er þó hér í kennaranáminu. Við áttum notalega kvöldstund. Spjölluðum og hlógum mikið. Ákváðum að endingu að reyna að æsa restina af ættinni til að koma saman á ættarmót næsta sumar. Vonandi hefst að koma því í kring. Gunnlaug mín tók nokkrar myndir af fjörinu.
Á fimmtudaginn hóaði Hilda vinkona mín okkur nokkrum konum í „brunch“. Það var auðvitað bara ljúft og skemmtilegt. Alltaf svo notalegt að hittast bara „við stelpurnar“ og spjalla um heima og geima. Þúsund þakkir fyrir notalega stund, Hilda mín!!!
Á föstudagskvöldinu var ég svo í matarboði hjá Ingólfi Ásgeir vini mínum. Hann klikkaði nottlega ekkert á því frekar en fyrri daginn, drengurinn sá!!!Stjanað við mann frá A-Ö fram á rauða nótt.
Hjálmfríður vinkona mín (og skólastjóri barnaskólans) úr Eyjum heimsótti mig svo um helgina. Við áttum saman yndislega helgi. Fórum í Jólagarðinn og borðuðum ís í Vín, drukkum kaffi á Bláu könnunni, spókuðum okkur í góða veðrinu í bænum og eyddum peningum í búðarrápi. Alveg eins og ekta túristar :-) Gærkveldinu eyddum við svo við grill og rauðvín og svaml í heita pottinum í Sandvík. Ekki mjög leiðinlegt það!!!! Hún flaug svo til baka með kaffivélinni í dag.

Þetta er búið að vera ljúf helgi, en daginn í dag tileinka ég samt honum Frissa mínum, því við eigum 34 ára brúðkaupsafmæli í dag. Það er langur tími, að vera búin að nudda þetta saman gegnum súrt og sætt í öll þessi ár og merkilegt nokk nokkurn veginn vandræðalítið. Við erum að vísu ekki alveg jafn-ungleg í dag og á myndinni hér að neðan, en ekki munar nú miklu samt......he,he.....

„Versló“ búin og alvara lífsins framundan!!!

2005-08-02T22:00:00.000Z

Jæja, þá er verslunarmannahelgi lokið þetta árið og nú er víst sumarfríi að verða lokið líka og ekkert nema brauðstritið framundan. Helgin var afskaplega notaleg hjá okkur. Vorum í Sandvíkinni með alla okkar fjölskyldu og áttum notalega og rólega daga. Tanja litla (nýja barnabarnið) kom meira að segja í heimsókn og var auðvitað knúsuð í bak og fyrir. Nú er hún byrjuð að brosa og allir keppast auðvitað við að kjá framan í hana. Um næstu helgi stendur til að skíra hana svo þá skreppum við suður. Aldrei að vita nema maður taki því rólega og fari lengri leiðina (austur-um) heim til baka, enda er maður nú víst ekki búinn með alla sumarfrísdaga þó maður sé byrjaður að vinna.
Ingvar móðurbróðir og konan hans komu í kvöld að sunnan og fá að gista í Sandvíkinni fram yfir handverkshátíðina, þannig að við verðum hvort sem er ekkert að dingla þar út frá næstu dagana.

Málningarvinnu lokið

2005-07-18T22:51:00.000Z

Þá er málningarvinnunni lokið á heimilinu í bili. Nú er vinnuherbergið mitt orðið fallega fölgult (var málað í dökkbláum lit þegar við keyptum húsið og ég var aldrei búin að gefa mér tíma til að mála það. Ég er næstum viss um að mér vinnst helmingi betur í herberginu eftir þetta en áður :-)
Það kannski endar með því að maður verður svo duglegur að maður fer að blogga daglega!!!!

Er líka búin að djöflast á gólfinu (og eldhúsgólfinu) með bónleysi og bóna svo herlegheitin upp á nýtt...þetta glansar eins og hjá kónginum núna!!!!
Vonandi fer svo bara að koma sólbaðsveður aftur.......

Þvílík leti

2005-07-16T12:44:00.000Z

Jæja, ég held maður ætti nú bara að fara að henda þessari bloggsíðu, því ekki nennir maður að skrifa á hana....en samt...kannski að maður reyni að þykjast eitthvað aðeins lengur. Er reynar búin að ætla að skrifa í nokkra daga en „blogg-spottið“ hefur verið svo hægvirkt að ég hef ekki nennt að bíða eftir að það opnaðist til að hægt væri að skrifa. Hef því bara setið og lesið blogg annarra.
Það hefur frekar fátt á mína daga drifið síðan síðast. Við fjölskyldan fórum að vísu suður eina helgi til að knúsa nýja barnabarnið, og hún var nottlega bara æðisleg. Annað hefur nú ekki verið ferðast á þessu heimili, nema út í Sandvík.
Datt í að taka til í vinnuherberginu mínu og mála það (mjög „gáfuleg“ iðja í 20 stiga hita að sumri til). Hef reyndar ætlað að gera þetta í ein 4-5 ár, þannig að það má kannski segja að tími hafi verið til kominn (húsið fylltist reyndar af gestum um leið og ég var búin að setja allt á hvolf út af þessum framkvæmdum....týpískt :-).
Er búin að henda fullt af góssi, m.a. ýmsum kennsluverkefnum sem ég útbjó á mínum 30 ára grunnskóla-kennsluferli.....ég hefði kannski átt að reyna að græða á þessu og selja stöffið....spurning hvort einhver kaupandi hefði fundist!!! :-)
Mig langar óhemju að skreppa eitthvað í ferðalag...veit bara ekki hvert, þannig að líkast til fer ég bara ekki neitt....en sjáum til, kannski kemur andinn yfir mig og ég hendist af stað eins og hendi veifað...

Myndablogg

2005-06-27T23:40:00.000Z

Myndina sendi Eygló

#
Talskilaboð sendi Eygló

Mannaleg

2005-06-27T00:34:00.000Z

Óskaplega er maður nú að verða mannaleg!!! :-)

Bræða hjörtu

2005-06-27T00:30:00.000Z

Maður veit nú alveg hvernig á að bræða hjörtun í ömmunum sínum :-)

Ný staða í lífinu

2005-06-22T22:52:00.000Z

Varð þeirrar lukku aðnjótandi í dag að vera ráðin sem lektor við kennaradeildina í HA. Það er að því leyti betra heldur en að vera aðjunkt að í þeirri stöðu felst fastráðning, minni kennsluskylda (og þar af leiðandi betri kjör... er þó ekki svo viss um að mánaðarlaunin sjálf, per se, séu mikið hærri) kostur á rannsóknarleyfi fyrr heldur en aðjunktar eiga kost á o. s.frv.
Varð að halda upp á þetta með einhverjum hætti og bauð því honum Frissa mínum út að borða á Götugrillið í tilefni dagsins.... Það var ljúft :-)

Nú þarf ég næst að finna mér tíma til að skreppa suður og knúsa litla, nýja barnabarnið....mig er alveg farið að klæja í puttana. Hún fór í bað í fyrsta skipti í dag og þar var tekin af henni þessi óborganlega mynd:

Stoltur faðir

2005-06-14T22:44:00.000Z

Mátti til með að setja inn eina mynd af þeim feðginunum saman

og aðra af litlu dúllunni aleinni:

Ekki hef ég hugmynd um hverjum hún líkist...þykist sjá svip beggja á myndunum af henni. Fleiri myndir eru í myndaalbúminu hans Bjössa

Stelpa fædd 15:20

2005-06-14T15:40:00.000Z

Húrra!!!! Lítil ömmustelpa leit dagsins ljós rétt í þessu. Fékk þessa mynd senda í símann minn beint af fæðingardeildinni. Tóm gleði og hamingja!!! :-)

Myndina sendi Eygló

Skólaárið búið

2005-06-12T23:29:00.000Z

Í gær var háskólahátíð í Háskólanum á Akureyri. Brautskráður var 291 nemi í yndislegu veðri í Íþróttahöllinni. Einhvernveginn fannst mér ég eiga tölvuvert í kennaradeildarnemunum sem voru að útskrifast. Nemunum á grunnskólabrautinni hef ég kennt mest. Kenndi þeim í GSK- námskeiði í fyrra, einnig hafði ég umsjón með vettvaqngsnáminu þeirra og æfingakennslunni í haust. Svo voru þarna að útskrifast nemar í kennsluréttindanámi sem ég kenndi í vetur og einnig hef ég kennt öllum nemunum sem voru að útskrifast af leikskólabrautinni. Mér leið eiginlega bara eins og stoltri ungamömmu sem lítur yfir gerðarlegan hópinn sinn!! :-). Til hamingju nýbakaðir kennarar!!!
Nú svo voru einnig að útskrifast nemar sem ég þekki í öðrum deildum, m.a. nokkrir Vestmannaeyingar bæði í staðarnámi og fjarnámi. Mér þótti samt leitt að það gafst ekkert tækifæri til að knúsa nemana neitt þegar maður kom út, því allt liðið var á bak og burt í myndatöku. Það var í staðinn óvænt ánægja að hitta fullt af Vestmannaeyingum fyrir utan Höllina sem voru þar að fagna áfanganum með afkvæmum sínum. Þetta endaði eiginlega í hálfgerðu átthagamóti þarna fyrir utan Höllina!!! Lokapunktur á góðum degi var svo útskriftarpartý hjá henni Maríu Steingríms vinkonu minni sem var að útskrifast með mastersgráðu í gær. Innilega til hamingju með það elsku María!!! Partýið var hið skemmtilegasta í alla staði enda ekki að búast við öðru af gleðipinnunum í kennaradeildinni sem yfirtóku gestalistann mest og best.

Er ekki bara að koma sumar??

2005-06-05T11:44:00.000Z

Á föstudaginn kláraði ég tveggja vikna kennslutörn þar sem ég þurfti að kenna 60 tíma á þessum tveimur vikum. Þetta voru fjarnemar á leikskólabraut sem eru rétt tæplega 60 að tölu og voru hér í sumarmisserislotu. Það komast ekki nema 20 í tölvustofuna í einu þannig að það varð að þrískipta hópnum og hver hópur fékk 20 tíma....þannig að 60 tímar féllu í valinn þetta vorið. Ég var orðin ósköp lúin á föstudaginn og fegin að törninni var lokið. Það reddaði málinu hvað þetta var skemmtilegur hópur og áhugasamur. Um kvöldið var vorferð kennaradeildar þar sem við fórum saman yfir á Kljáströnd á ættaróðal Halldóru og gengum, borðuðum, drukkum, kveiktum varðeld, sungum og margt fleira. Yndislegt kvöld með skemmtilegu fólki. Ég fór svo í gær í Blómaval og keypti sumarblómin í Sandvíkina og setti niður um kvöldið. Þannig að nú er orðið voða blómlegt og sumarlegt á Nesinu.

Lokafréttir af jakanum

2005-06-05T11:42:00.000Z

Ég var svo heppin að vera ákkúrat með myndavélina í höndunum í gær þegar það heyrðust skruðningar frá jakanum "okkar" hér á Nesinu og stórt stykki hrundi af honum með miklum bægslagangi. Eins og sést á myndinni hér fyrir neðan gengu gusurnar í allar áttir. Við þetta losnaði jakinn úr strandinu sem hann er búinn að vera í núna í tvær vikur og hélt af stað en núna ákvað hann að halda aftur út fjörðinn í áttina norður. Hann fór bara þó nokkuð hratt og þegar við litum út í morgun um tíuleytið sást hann ekki frá pallinum okkar.

Útsýnið úr Sandvíkinni

2005-05-22T17:40:00.000Z

Það er ekki amalegt útsýnið af pallinum í Sandvíkinni þessa stundina. Ísjakinn í allri sinni dýrð!! Á myndinni má sjá hvar slysavarnaskipið Sæbjörg siglir fram hjá jakanum á leið út fjörðinn!!

Landsins forni fjandi

2005-05-16T22:48:00.000Z

Þrátt fyrir sólbaðsveður á pallinum í Sandvík bæði í dag og í gær, þá var nú kuldaboli ekki langt undan. Þessi fíni ísjaki var t.d. á siglingu inn Eyjafjörðinn um helgina og var úti fyrir Árskógssandi í kvöld. Ætli hann verði ekki við Hauganesið á morgun!!!

Fleiri myndir af ísjakanum á myndasíðunni

Góð helgi

2005-05-16T00:31:00.000Z

Jæja, ekki er maður nú svikinn af helgarveðrinu. Hér í Sandvíkinni er búið að vera sól og blíða yfir helgina og hægt að baða sig í sólinni í skjóli. Að vísu eru engin hlýindi komin ennþá.
Nú erum við búin að setja vindhanann upp á þak sem við fengum frá Gunnlaugu og co. í jólagjöf. Hann sómir sér vel þar og eins og sést á myndinni er himininn hvergi blárri en hér hjá okkur á Íslandi.

Vorið alveg að koma

2005-05-12T10:02:00.000Z

Og fyrst ég er nú á annað borð að skrifa eitthvað hér inn þá má ég til með að sýna ykkur að túlípanarnir og páskaliljurnar mínar á Nesinu eru alveg að fara að springa út.....vonandi gerist það í blíðviðrinu sem þeir spá hér um hvítasunnuna!!!

Long time, no see.....

2005-05-12T09:52:00.000Z

Jæja, nú er orðið langt síðan hér hefur verið bloggað. Engin haldbær afsökun fyrir því svo sem, en á maður ekki líka að blogga þegar maður sjálfur er í stuði til þess, en ekki bara af skyldurækni???
Það var ferming í fjölskyldunni í endaðan apríl. Guðný litla í Hríseynni náði þeim merka áfanga að komast í kristinna manna tölu. Stór hluti fjölskyldunnar úr Eyjum mætti því á svæðið og smellti ég einni mynd af systrum mínum þegar þær borðuðu hjá mér eitt kvöldið. Ekki víst að maður fái mörg tækifæri til að ná þeim saman á mynd hér norðan heiða...en hver veit...núna fyrst þetta hafðist að koma þeim báðum samtímis hingað norður í þetta sinn. Að vísu var Blönduósvegalöggan eitthvað að hrella aðra þeirra, en það má sjá við því í framtíðinni .

Að aflokinni strangri vinnuviku

2005-04-08T17:15:00.000Z

Slappað af eftir eril dagsins!
Tók þessa mynd á símann minn af henni Jórunni samstarfskonu minni þar sem við sátum nokkur saman á kaffistofunni og spjölluðum áður en haldið var heim í helgarfrí. „Hálfi maðurinn“ á myndinni er Bragi Guðmundsson :-)

Páskafrí á enda

2005-03-29T00:26:00.000Z

Þá er nú páskafríið að renna sitt skeið á enda þetta árið. Veðrið var yndislegt eins og sjá má á myndinni hér að neðan og ekki hægt að hafa það mikið betra en við höfðum það þessa daga. Setti inn myndir frá helginni í myndasafnið mitt hér til hliðar. Njótið !!

Vorið á næsta leiti??

2005-03-25T14:36:00.000Z

Brá mér suður undir húsvegg áðan og smellti af einni vorlegri mynd af krókusunum mínum með nýju myndavélinni.

Sæludagar

2005-03-25T14:28:00.000Z

Ingólfur Ásgeir vinur minn bauð okkur í mat í fyrrakvöld. Það klikkaði ekki frekar en fyrri daginn. Saltfisk„mús“ í forrétt, mexíkóskur lambapottréttur í aðalrétt og herlegheitunum skolað niður með spönsku eðal-rauðvíni. Yndislegt að eiga svona vini

Blessaður miðlungurinn og spúsan hans heiðruðu okkur svo með nærveru sinni frá því á þriðjudag og þar til á hádegi í dag. Áttum notalega fjölskyldustund í gær með rjómapönnukökum um miðjan daginn og lambalæri í kvöldmat. Ljúft er þetta líf!!

En nú er best að skreppa út og smella af mynd af krókusunum mínum og snúa sér svo að alvarlegri hlutum og vinna svolítið...ekkert annað að gera við þennan langa föstudag!!

Ný myndavél

2005-03-18T09:52:00.000Z

Ég skeiðaði í Tölvulistann í gær og fjárfesti í nýrri digital myndavél. Keypti mér Canon Ixus 500. Það er vel látið af þeim og ég þekki tvo sem eiga þannig vél og eru mjög ánægðir með þær. En hver er svo sem ekki ánægður með sitt :-)

Fyrir á ég Sony Mavica sem er þannig hönnuð að í stað þess að vera með kort, þá tekur hún myndir á venjulega disklinga sem maður setur í hana. Þetta gerir það að verkum að hún er dálítið fyrirferðamikil og leiðinlegt að þvælast með hana á ferðalögum (sú nýja er algert kríli og kemst nánst fyrir í peningahólfinu í veskinu mínu). Hins vegar er Mavican með 10 optical súmmi sem gerir hana góða í því sambandi og hún er í fínu standi þrátt fyrir 5 ára notkun og tekur svo sem ágætis myndir en ekki í eins mikilli upplausn og nýja vélin. Svo er bara að byrja að æfa sig á nýju vélina! Opnaði í því tilefni myndagallerí hér til hægri á síðunni. Þar eru reyndar bara ennþá gamlar myndir, sambland tekið af hinum og þessum á ýmsar vélar.

Ástkæra, ylhýra....

2005-03-15T10:13:00.000Z

Var að blaða í gegnum bæklinginn „Stefna menntamálaráðuneytisins um upplýsingatækni í menntun, menningu og vísindum 2005-2008“. Það er greinilegt að það hefur enginn íslenskufræðingur komist með puttana í þennan bækling....þvílíkar ambögur og málskrúð sem þar er að finna.
Dæmi: „það er því mikilvægt að ekki verði reistar óeðlilegar hindranir í vegi fyrir miðlun upplýsinga.....“. „Kennarar, sem búa til og nota stafrænt efni, eru í óvissu um hvaða verndar verk sín njóta.....“. Þessi tvö dæmi eru bæði af blaðsíðu 41 en bæklingurinn er upp á 45 blaðsíður. Hinar eru svipaðar.
Ja, það er ekki skrýtið þó góðu íslensku máli sé ekki gert hátt undir höfði alls staðar fyrst ráðuneytið sjálft hefur ekki meiri metnað.....

Lóa litla

2005-03-13T10:00:00.000Z

Fór á „Taktu lagið, Lóa“ í gærkvöldi ásamt Degi og tengdaforeldrum Gunnlaugar, Jóni og Siggu. Við höfðum hina bestu skemmtun út úr þessu og þótti gaman að sjá hann Daníel okkar frá „nýju“ sjónarhorni :-)
Mér fannst allir leikararnir skila sínum hlutverkum prýðisvel og sannfærandi og María virkilega söng sig inn í hjörtu þeirra sem á hlýddu. Mæli hiklaust með þessu.
Miðlungurinn var að setja inn myndir úr „fjölskylduútilegunni“ síðasta sumar. Fer ekki að koma sumar???

Samskiptagreindin :-)

2005-03-06T21:33:00.000Z

Your Dominant Intelligence is Interpersonal Intelligence

You shine in your ability to realate to and understand others.
Good at seeing others' points of view, you get how people think and feel.
You have an uncanny ability to sense true feelings, intentions, and motivations.
A natural born leader, you are great at teaching and mediating conflict.

You would make a good counselor, salesperson, politician, or business person.

Hvaða greind er öflugust hjá þér?

„Æfingin skapar meistarann“

2005-02-28T22:31:00.000Z

Það er ekki ofsögum sagt að „æfingin skapi meistarann“...

Tókst í dag á „no time“ að búa til þetta „huggulega“ blóm, fríhendis í tölvunni og alveg sjálf!!!

Ekki sem verst af byrjanda að vera, eða hvað????

Norðurljósin

2005-02-27T11:41:00.000Z

Mikið rosalega líst mér vel á þá hugmynd Jóhanns Ísbergs og félaga að reyna að auka ferðamennsku á Íslandi yfir vetrartímann með því að selja útlendingum allar þær gersemar sem okkar kalda land býr yfir á þeim árstíma. Það var löngu orðið tímabært að menn áttuðu sig á því að ferðamennska á Íslandi getur verið meira en bara júlí-mánuður. En það tekur tíma og er mikil vinna, að koma sér á kortið....vonandi tekst þeim að yfirstíga byrjunarörðugleikana!!

Hrós

2005-02-27T10:55:00.000Z

Gleymdi að taka fram að knús vikunnar fær Harpa Hreins fyrir að vera svo elskuleg að veita mér aðgang að lexíum sem hún hefur hannað um notkun Paint Shop Pro. Að vísu þurfti ég að „uppfæra“ þær þannig að hægt sé að nota þær með 9.0 útgáfunni...en.... það sparaði mér samt hellings tíma að þurfa ekki að hanna verkefni sjálf alveg frá grunni. Þarf þó kannski að bæta einhverju við ef stelpurnar verða rosalega vinnusamar og duglegar (sem þær örugglega verða)...en samt.. það sparaði mér hellings tíma að fá þetta hjá Hörpu. Takk og knús, Harpa mín :-)

Söknuður

2005-02-27T10:35:00.000Z

Ég er ekki frá því að ég sakni jólagardínanna úr eldhúsinu...en það sem sé hafðist að koma þeim niður í gær og febrúar enn ekki búinn...., en litlu mátti þó muna :-)

Hamast við að læra á Paint Shop Pro þessa dagana. Ætla að nota það í kennslu á leikskólabrautinni fljótlega. Mér sýnist það alveg ná því að vinna með allar þær aðgerðir sem hinn venjulegi „meðal-jón“ notar í myndvinnslu og þykir mun líklegra að til að mynda leikskólakennarar eigi möguleika á að fá það forrit keypt til brúks í leikskólanum sínum (það kostar á milli 6- og 7000) en Adobe PhotoShop sem kostar á milii 60 og 70 þús. krónur eintakið. Það er nú ekki eins og við ætlum að útskrifa grafíska hönnuði þarna á leikskólabrautinni (með fullri virðingu fyrir grafískum hönnuðum og leikskólakennurum). Bar þessa skoðun mína undir „valda“ leikskólakennara í fjölskyldunni sem voru mér alveg sammála. Og einhvern veginn finnst mér skynsamlegra að læra á forrit sem einhver möguleiki er á að maður sjálfur (eða allavega skólinn sem maður starfar við) geti eignast að námi loknu, heldur en að læra einhverja tækni sem maður verður búinn að gleyma eftir nokkra mánuði af því að maður hafði aldrei séns á að halda náminu við.

Jóla hvað...

2005-02-16T10:49:00.000Z

Þeir rétti upp hönd sem finnst að ég ætti að taka niður jólagardínurnar í eldhúsinu!!!

Það er nú það...

2005-02-15T21:20:00.000Z

Það er nú svo langt síðan að hér hefur verið bloggað að það er nánast helgispjöll að rjúfa þessa þögn hér inni..... :-) en er búin að fara bæði til Færeyja og Danmerkur síðan ég bloggaði síðast og ligg nú hér heima með flensu og er orðin frekar pirruð á þessu ástandi....
Í Færeyjum kynnti ég fjarkennsluna okkar hér í HA fyrir frændum okkar í Føroya Lærarskúli og var það bara gaman. Þeir klikkuðu ekkert á höfðinglegum móttökum þarna í Færeyjum, dekrað við mann alla daga. Í Danmörku (nánar tiltekið Ollerup) var ég ásamt 3 íslenskum kennslukonum og kennurum úr kennaraskólanum í Ollerup og Haslev að hanna umsókn um Evrópustyrk (Sókrates-áætlunin). Meiningin er, ef við fáum styrkinn, að reyna að hanna matstæki sem metur einstaklingsmiðað nám.
Vona að þessu flensufári fari að ljúka annars verð ég alveg orðin brjáluð í geðvonsku...:-)

Áramót

2005-01-02T22:52:00.000Z

Áttum yndisleg áramót í Sandvíkinni. Að vísu var engin brenna því sýsli í Eyjafirði bannaði allar brennur í firðinum þrátt fyrir einmunablíðu....allur er varinn góður...

Svo brast hann á með snjókomu á aðfaranótt nýársdags:

Smellti einni mynd af litlu börnunum mínum (það er svo stutt síðan þau voru lítil) þó svo að þau séu engin kornabörn að sjá á þessari mynd:

Gaman að þessu...:-)

Jólin

2004-12-30T03:08:00.000Z

Já, gleðileg jólin og allt það ...;-)
Þá er yfirferð á síðasta verkefni haustannar lokið...jibbí...ekkert smá fegin. Alltaf gott þegar eitthvað klárast. Talaði svo við Hörpu í kvöld í gegnum Skype-ið. Gaman að því:-)
Til gamans má geta þess að við Harpa höfum aldrei sést, en spjölluðum samt saman eins og bestu vinkonur...segiði svo að maður geti ekki átt „virtual vini“ :-)

Svo eru bara áramótin framundan!!...
Við stefnum á að vera með allt okkar hyski (10 manns samtals) í Sandvíkinni í notalegheitum...
Hér sé friður...:-/

Annríki

2004-12-01T01:10:00.000Z

Mér sýnist næstum ég bara geta óskað gleðilegra jóla strax því það verður ekki mikill tími til að blogga á næstunni....en sjáum til, kannski finnst laus stund fyrir 24. des. Hver veit!!!

Ertu nú ánægð??

2004-11-20T16:20:00.000Z

Hilda vinkona mín var að skamma mig fyrir bloggleysi!!! Nú er ég búin að blogga þrem færslum á 1/2 sólarhring og segi því bara: „Ertu nú ánægð, kerling“ !!! :-)

To be or not to be....

2004-11-20T16:04:00.000Z

Eins og alþjóð veit þá sendu kennara Brekkuskóla andlátstilkynningu vegna skólastefnu Akureyrarbæjar í Dagskrána í vikunni og sýndist sitt hverjum um það tiltæki. Ég ætla ekkert sérstaklega að hafa skoðun á því máli, aðra en þá ,að ég held að þetta hafi nú kannski verið gert án þess að málið væri hugsað til enda og ekki get ég tekið þetta sem neina móðgun við börnin eða forelda þeirra, því mér sýnist þessu hafa verið beint að skólayfirvöldum bæjarins fyrst og fremst.

Var samt pínulítið að velta fyrir mér málflutningi mannsins sem komið hefur fram í fjölmiðlum sem sjálfskipaður fulltrúi foreldar í þessu máli. Hann gagnrýnir kennara m.a. fyrir það að hafa beitt börnunum fyrir sig sem vopni í þessari kjarabaráttu og er svo sem ekki einn um það. Hins vegar hélt þessi sami maður börnunum sínum heima og sendi þau ekki í skólann í tvo daga, í mótmælaskyni við skólann og kennarana.
Hver var þar að beita börnunum fyrir sig sem vopni í einhverju áróðursstríði, spyr ég nú bara!!!
Æ, einhvern veginn flaug nú í gegnum huga mér Biblíu-spekin um „flísina, bjálkann og augað“ eða þannig :-/

Fljótur að skipta um skoðun

2004-11-19T21:19:00.000Z

Þessi var fljótur að skipta um skoðun á landinu okkar:

12. ágúst – Fluttum til Íslands að vinna. Settumst að fyrir austan. Ég er svo spenntur. Það er svo fallegt hérna, fjöllin eru dýrleg. Ég get ekki beðið eftir að sjá hvernig þau líta út í vetur þegar það fer að snjóa.

14. október - Ísland er fallegasta land í heimi. Laufin eru öll rauð og appelsínugul. Sáum hreindýr í dag. Þau eru svo falleg. Það er svo kyrrlátt hérna, algjör paradís. Ég ætla sko að búa hérna það sem eftir er.

11. nóvember - Bráðum byrjar hreindýra veiðitímabilið. Ég get ekki ímyndað mér að einhver vilji drepa þessi fallegu dýr. Vona að það fari að snjóa. Ég elska þetta land.

15. nóvember - Það snjóaði í nótt. Þegar ég vaknaði var allt hvítt. Þetta er eins og póstkort. Við fórum út og hreinsuðum snjóinn af tröppunum og mokuðum innkeyrsluna. Fórum í snjóbolta slag (ég vann). Þegar snjóruðningstækið ruddi götuna, þurftum við að moka aftur. Ég elska Ísland!

22. nóvember - Meiri snjór í nótt. Snjóruðningstækið lék sama leikinn með innskeyrsluna okkar. Fínt að vera hérna.

15. desember - Enn meiri snjór í nótt. Komst ekki út úr innkeyrslunni og í vinnuna. Það er fallegt hérna, en ég er orðinn ansi þreyttur á að moka snjó. Helvítis snjóruðningstæki.

22. desember - Meira af þessu hvíta drasli féll í nótt. Ég er kominn með blöðrur í lófana og illt í bakið af öllu þessu moki. Ég held að gaurinn á snjóruðningstækinu bíði við hornið þar til ég er búinn að moka innkeyrsluna. Helvítis asninn.

24. desember - Gleðileg Jól, eða þannig! Enn meiri anskotans snjór. Ef ég næ í helvítis fíflið sem keyrir snjóruðningstækið, þá sver ég að ég drep helvítið. Af hverju salta þeir ekki helvítis göturnar hérna meira.

18. janúar - Meiri hvítur skítur í nótt. Búinn að vera inni í þrjá daga. Bíllinn er fastur undir heilu fjalli af snjó sem fíflið á ruðningstækinu er búinn að ýta að innkeyrslunni okkar. Veðurfræðingurinn spáði 20 cm jafnföllnum snjó næstu nótt. Veistu hvað það eru margar skóflur?

19. janúar - Helvítis veðurfræðingurinn hafði rangt fyrir sér. Við fengum 35 cm af skít í þetta skipti. Ef það heldur svona áfram þá bráðnar þetta drasl ekki fyrr en um mitt sumar. Snjóruðningstækið festi sig í götunni og helvítis fíflið kom og spurði hvort ég gæti lánað honum skóflu. Eftir að hafa sagt honum að ég væri búinn að brjóta sex í vetur við að moka í burtu snjónum sem hann ýtti jafnóðum inn í innkeyrsluna, munaði minnstu að ég bryti eina enn á hausnum á honum.

4. febrúar - Komst loksins út úr húsi í dag. Fór í búðina að versla og á leiðinni til baka hljóp hreindýr fyrir bílinn. Skemmdir upp á tugi þúsunda. Vildi að þessum kvikindum hefði verið útrýmt síðasta haust.

3. maí - Fór með bílinn á verkstæði í bænum. Ótrúlegt hvað þetta ryðgar af öllu þessu saltdrasli sem þeir strá á vegina.

19. maí - Flutti til Spánar. Skil ekki að nokkur maður með viti skuli vilja búa á skítaskeri eins og Íslandi!

Kjarabarátta kvenna

2004-11-19T20:14:00.000Z

Veit ekki hvort ég á að nenna að minnast á kennaradeiluna....en alveg er það samt stórmerkilegt hvað alltaf er reynt að höfða til samvisku kvenna þegar svona hlutir eins og verkföll gerast (og svona er það búið að vera öll mín 30 ára grunnskólakennara-ár). Það er búið að hamra á því allt verkfallið hvað aumingja börnin eigi bágt (sem þau vissulega áttu) og hvað kennarar séu vondar manneskjur. Og ekki minnkar áróðurinn núna, eftir að skrifað var undir samninginn.

Nú er reynt með öllum ráðum að koma því inn hvað þetta sé nú obboðslega mikil hækkun og hvernig þetta gersamlega kollkeyri fjárhag sveitarfélaganna, svo mjög að jafnvel þurfi að segja upp öðrum bæjarstarfsmönnum svo hægt sé að borga kennurum laun. Það var svo sem auðvitað að enn ætti að reyna að að kenna kennurum um það sem miður fer í landsmálunum. Það er svo gaman fyrir þá að geta haft það á samviskunni ofan á alla mannvonskuna gagnvart börnunum, að heilu sveitarfélögin séu komin á hausinn!!!

Ég hef ekki mikið vit á sveitastjórnarmálum, en ansi held ég að þau sveitarfélög sem rúlla yfir núna vegna samninganna við kennara, hljóti að hafa staðið tæpt fyrir!!! Ég held það hljóti þá að hafa aðeins verið tímaspursmál hvenær þau hefðu rúllað hvort sem var!!
Ætli þessi áróður væri með sama hætti ef þetta væri karlastétt??

Valash

2004-11-11T18:53:00.000Z

Í þá góðu, gömlu daga var til „límonaði“ (gosdrykkur) sem hér Valash og var framleitt hér norðan heiða. „Húsbóndinn“ á mínu heimili :-) á enn þá til að segja í sjoppulúgum landsins: „ Ég ætla að fá eina Valash...“.
Það þarf vart að taka fram að aumingja unglingsstúlkurnar í sjoppunum horfa á hann í forundran og verða vandræðagangurinn uppmálaður...enda ekki nema von....Valash hvað!!!!

Hafði ekki heppnina með mér

2004-11-09T21:06:00.000Z

Jæja, ekki var heppnin með mér í þetta sinn. Búið að ákveða hvaða verkefni komust í úrslit í keppni Evrópska skólanetsins. En ég er nú ósköp sátt(þó gaman hefði verið að skreppa til Prag)....segi bara eins og íþróttahetjurnar: „um að gera að taka þátt, það geta ekki allir unnið“ !! :-)

Styttist til jóla

2004-11-07T20:27:00.000Z

Komst að því í dag í Jólagarðinum að það styttist all-verulega til jóla!!!Mér sem fannst eiginlega sumarið ekki búið..... enda var hér 18°stiga hiti um miðjan dag á laugardaginn.

Eyvi

2004-10-31T21:56:00.000Z

Eyvi frændi er í sjónvarpinu....er að syngja og rifja upp æskuárin þegar amma hans var að passa þau systkinin heima hjá þeim í Vogunum....
Ég man hins vegar eftir því hvað við systurnar urðum kindarlegar einu sinni þegar við vorum í matarboði þar heima ásamt foreldrum okkar. Við höfðum skroppið eitthvað upp á loft eftir matinn og í stiganum á leiðinni niður aftur mættum við Línu ömmu hans í stiganum(hún hafði reyndar setið til borðs með okkur). Hún var afskaplega falleg og notaleg kona og nú heilsaði hún okkur með virktum og spurði hvort við „þekktum nokkuð hann Bjössa mág hennar í Vestmannaeyjum“ (pabba okkar)!!
Við urðum eitt spurningamerki í framan og böbluðum eitthvað alveg eins og kjánar en fengum svo að vita á leiðinni heim að „Lína frænka“ væri með Alzheimer og það væri ástæðan fyrir þessu minnisleysi hennar á ættartengslunum við okkur systur. Já, ekki skemmtilegur sjúkdómur þessi Alzheimer.

2004-10-31T13:22:00.000Z

Búist til sjóferðar með afa!
Myndina sendi Eygló

2004-10-31T12:18:00.000Z

Ömmustrákur að borða köku i Sandvíkinni!
Myndina sendi Eygló

2004-10-28T09:51:00.000Z

Það er fallegt að horfa upp i Hlíðarfjall núna!
Myndina sendi Eygló

Undanúrslit

2004-10-27T19:53:00.000Z

Fékk að vita það áðan að námsefnið mitt í grenndarkennslu „Á heimaslóð“, er komið í undanúrslit í ELearningAward keppninni sem haldin er á vegum Evrópska skólanetsins. Var valið ásamt 99 öðrum úr 1021 verkefni.

Gaman að þessu!!! :-)

Leikhús

2004-10-24T23:01:00.000Z

Fór í leikhúsið í kvöld að sjá Svik. Alltaf gaman að fara í leikhús. Veit samt ekki alveg hvað mér fannst um sýninguna.....

Leikararnir skiluðu góðum leik, en umfjöllunarefnið...sem var framhjáhald...æ, einhvern veginn skyldi það ekkert mikið eftir hjá mér.....

Afmæli...

2004-10-19T10:34:00.000Z

Já, og meðan ég man...ég á svo nottlega afmæli í dag...var eiginlega alveg búin að gleyma því!!! Svona er maður nú orðinn gamall, gleymir eigin afmæli!!!
Ja, svei....:-)

Kveðjuhóf

2004-10-19T10:30:00.000Z

Félagsvísinda- og lagadeildin er að flytja upp á Sólborg. Í tilefni af því var kveðjuhóf á kaffistofunni í 9-kaffinu í morgun. Alls konar gúmmulaðis-kökur, heimabakað brauð, ostar og annað góðgæti....ummi-numm......

Við erum að hugsa um að kveðka þau vel og vandlega og halda líka kvöldteiti með guðaveigum, skemmtiatriðum og alles....Gaman að þessu!!!

Svefn

2004-10-17T23:18:00.000Z

Afrekaði það í dag að sofa frá því kl. rúmlega eitt í gærkvöldi og til kl. 13:30 í dag....en þá líka vaknaði ég með andfælum og hélt að allr klukkur í húsinu hlytu að vera vitlausar. Þvílíkt og annað eins ......er þetta hægt hjá manneskju á mínum aldri? Þetta hefði kannski verið afsakanlegt á táningaaldrinum.

"Ellistyrkurinn" blessaður á afmæli í dag. Er orðinn 19 ára. En hvað þetta líður hratt. Mér finnst það hafa verið í fyrradag sem hann fæddist blessaður!!
Bakaði slatta af kökum og fékk dótturina, tengdasoninn og barnabörnin í kaffi...Svana vinkona og fjölskylda kíktu líka í kaffi!!!
Gaman að því :-)

Útgáfuteiti

2004-10-10T19:23:00.000Z

Hún Brynhildur íslenskukennari í forföllum við HA og hann Þóroddur maður hennar (kennari í fél. og laga) buðu kennaradeildinni og félgsvísinda- og lagadeildinni í smá útgáfuteiti seinnipartinn á föstudaginn. Brynhildur var að fá íslensku barnabókaverðlaunin fyrir nýútkomna bók sína Leyndardómur ljónsins, auk þess var bókin hennar um Njálu (minnir mig ) að koma út í enskri þýðingu. Nú svo kom bókin Egla út eftir hana á þessu ári. Dugleg kona Brynhildur!
Bók sem Þóroddur er ritstjóri að (Íslensk félagsfræði: Landnám alþjóðlegrar fræðigreinar) var svo líka að koma út þann 1. okt. þannig að það var margfalt tilefni til að gleðjast hjá þeim hjónum. Þau fluttu hingað til Akureyrar síðla sumars og keyptu sér fallegt og reisulegt hús á horni Hamarstígs og Oddeyrargötu. Þetta varð hið skemmtilegasta teiti og góður endir á vinnuvikunni.

2004-10-08T11:47:00.000Z

Kaffipása í Þingó
Myndina sendi Eygló

Slowblow

2004-10-04T23:23:00.000Z

Var að hlusta á Slowblow diskinn sem ég keypti mér um daginn. Nokkuð athyglisverður og sérstakur diskur....

Allt tekur enda...

2004-10-04T23:11:00.000Z

Allt tekur enda...líka Londonferð. Höfðum það þrusugott í ferðinni. Skoðuðum allt það markverðasta og versluðum aðeins líka. Var að hugsa um að reyna að fá vinnu sem „gæd“ í „Undergroundinu“, þvílík var nú snilldin orðin í þeim málum á 4. degi :-). Komst reyndar á bragðið þegar ég dvaldi í London í hálfan mánuð 1980 og komst að því að égf hafði litlu gleymt.

Svo er hann brostinn á með kulda og rigningu hér norðlendis....verulega ógeðslegt veður. Fyrir sunnan rignir í hlýju áttinni en alveg öfugt hér....kalt og blautt...

Maður verður líka að vera menningarlegur í London :-)

2004-09-28T15:51:00.000Z

Fyrir utan Náttúrugripasafnið!
Myndina sendi Eygló

Í London

2004-09-27T16:09:00.000Z

Það er nú gott að hvíla sig i Hyde Park
Myndina sendi Eygló